Showing posts with label பில்லா-2. Show all posts
Showing posts with label பில்லா-2. Show all posts

Monday, July 30, 2012

என்ன கொடுமை சார் இது-7


பில்லா-2 : ஒரு கண்ணோட்டம்.

பில்லா-2 ஒரு வழியா பார்த்தாச்சு , படம் வெந்ததும் வேகாததுமா பொங்கின சோறாட்டம் இருக்கு .அதுக்கு முதல் காரணம் "corporate film production house"கள் முதல் பிரதி அடிப்படையில் படம் எடுக்கும் சமீபத்திய தயாரிப்பு கலாச்சாரம் தான் காரணம் எனலாம்.

அஷோக்லெய்லாண்ட், ஃபோபர்ஸ் ஊழல் புகழ் இந்துஜா குழுமத்தின் படத்தயாரிப்பு பிரிவான "IN Entertainment"(ine)க்கு முதல் பிரதி அடிப்படையில் பழைய நடிகரும் தயாரிப்பாளரும், மோகன்லாலின் மாமனாருமான அமரர்.கே.பாலாஜியின் சுஜாதா சினி ஆர்ட்ஸின் "சுரேஷ் பாலாஜி "கூட்டில் wideangle creations இப்படத்தினை தயாரித்துள்ளது.

முதல் பிரதியாக படம் எடுப்பது என்றால் தயாரிக்கும் போதே ஒரு தொகையை ஒதுக்கிவிடுவது கோடம்பாக்கம் கலாச்சாரம் அதன் அடிப்படையில் பணத்தை ஒதுக்கியதன் விளைவால் படம் ஏனோ தானோ என உருவாகியிருக்கிறது, பிரமாண்டம் எல்லாம் வார்த்தையில் தான் , ஹெலிகாப்டர் பயன்ப்படுத்தி ,வெளிநாட்டில் படம் எடுத்தால் பிரமாண்டம்னு சொல்லிக்கலாம்னு செய்து இருக்காங்க, உண்மையில் வெளிநாட்டில் படம் எடுப்பது இந்தியாவில் படம் எடுப்பதை விட சிக்கனமானது. இப்படத்திற்கு கூட ஜியார்ஜியா அரசு ஹெலிகாப்டர் எல்லாம் இலவசமாக கொடுத்தது முதல் பல உதவிகள் செய்துள்ளது.

பல நாடுகளில் அவங்களுடைய "லேண்ட் மார்க்,சுற்றுலா தலங்களை" படத்தில் காட்டினால் உதவி தொகை கூட கொடுப்பது வழக்கம். மலேஷியாவில் பெட்ரோனாஸ் டவர் படத்தில் தெரியும் படிக்காட்டினால் உதவித்தொகை உண்டாம்.எல்லாம் அவர்கள் நாட்டுக்கு சுற்றுலா விளம்பரமாக அமையும் என்று தான்.

அஜித்துக்கு சம்பளம் கொடுத்தது தான் படத்தில் மிகப்பெரிய செலவு, அப்புறம் கோட்டு ,கருப்பு குளிர்க்கண்ணாடி வாங்கிய வகையில் தான் அதிகம் செலவு ஆகி இருக்கும் :-))

மற்ற எல்லாரையும் அஜித் படத்தில் நடிக்க ஒரு வாய்ப்பு என "தூண்டில்" போட்டு அடிமாட்டு சம்பளத்திற்கு பிடிச்சு போட்டு இருப்பாங்க போல, பட்ஜெட்டை செயற்கையாக சுருக்கியதால் பில்லா-1 எடுத்த விஷ்ணுவர்தன்,நிரவ் ஷா எல்லாம் சம்பளம் கட்டுப்படியாகாமல் கழண்டுக்கொள்ள சக்ரி டோலெட்டி போன்ற அப்ரண்டீஸ் வச்சு படம் எடுத்துட்டாங்க போல.

படத்தில் தங்கள் இருப்பை ஓரளவுக்கு காட்டியவர்கள், கதையின் நாயகன் அஜித், ஒளிப்பதிவு இயக்குனர் ஆர்.டி.ஆர், "லார்ட் ஆஃப் தி ரிங் புகழ் "கணினி வரைகலை நிபுணர்,மது சூதனன் ஆகியோர் மட்டுமே. மற்றவர்கள் எல்லாம் பெயர்ப்பட்டியலில் போட மட்டுமே பயன்ப்பட்டிருக்கிறார்கள்.

பார்வதி ஓமணக்குட்டி ..ஓணான் குட்டி போல இருக்கு, சொன்னால் தான் காதலா படத்தில் மும்தாஜ் அறிமுகம் ஆனப்போது ஓணான் குட்டியை விட அழகாய் இருந்தாப்போல தெரியுது,அழகிப்போட்டியில் எல்லாம் கலந்துக்கொண்டப்பார்ட்டின்னு பில்ட் அப் வேற,அழகிப்போட்டியில எதைப்பார்த்து அழகின்னு முடிவு பண்ணாங்களோ :-))

பிரேசில் அழகின்னா சும்மா செதுக்கி வச்ச சிலையாட்டம் இருக்கும்னு பார்த்தால் செத்துப்போன பல்லியாட்டம் இருக்கு புருணா அப்துல்லா , T.B patient கு எல்லாம் பிகினி போட்டு நடமாட விட்டு இருக்காங்கப்பா :-))

படத்தின் முக்கிய பெண் கதாப்பத்திரங்கள் ரெண்டும் நடமாடும் செட் பிராப்பர்டி என்ற அளவிலேயே படத்தில் பயன்ப்படுத்தப்பட்டு இருக்காங்க,அதுக்கு மேலோ/கீழோ சொல்ல எதுவும் இல்லை :-))

கதையின் நாயகன் அஜித் antagonist என்பதால் கொலைகளுக்கும் நியாயம் கற்பிக்கிறார்கள்.பகவான் ஶ்ரீகிருஷ்ணாவுக்கு அடுத்து omni potent and omni present உள்ளவரா பில்லா ...டேவிட் பில்லா ஆக நடிச்சு இருக்கார் தல, எல்லாம் வல்லவராக வீழ்த்த முடியா மாவீரனாக எல்லா இடத்திலும் தோன்றுகிறார்(trivia:ajith means unconquered in sanskrit) உச்சபட்சமாக வில்லன் டிமிட்ரியின் ஹெலிகாப்டரிலும் பிரசன்னம் ஆகி ,டிமிட்ரியை(oosaravelli,force fame vidyut jamwal) சம்ஹாரம் செய்கிறார்.

பில்லாவின் மண்டையில அடிச்சாலும்,சுட்டாலும்,கத்தியால் குத்தினாலும் terminator -2 இல் வரும் cyborgT-1000 போல அசராம திரும்ப திரும்ப வந்து நிறைய பேரின் கதையை டெர்மினேட் செய்றார், பேசாம டெர்மினேட்டர்-2 என்றே படத்துக்கு பெயர் வைத்திருக்கலாம் :-))


கேங்க்ஸ்டர் படம் என்பதால் கொலைகளும் மாபியா ஸ்டைலில் இருக்க வேண்டும் என கழுத்தில்/தொண்டையில் குத்துகிறார்கள். கிளைமாக்சில் கோவா அமைச்சரை காதில் குத்துகிறார்கள் என நினைக்கிறேன் படத்தில் சென்சார் கருதி சரியாக காட்டவில்லை.

ஐஸ் கட்டி உடைக்கும் "ice pick" வைத்து காதில் குத்தி கொல்வது மாபியா ஸ்டைல், அதே போல கழுத்தில்/தொண்டையில் பல முறை குத்துவார்கள், மேலும் ஒவ்வொரு கொலைக்கும் ஒரு பொருள் உண்டு,அதன் மூலம் ஒரு மெசேஜ் சொல்வார்கள். மாபியாக்கள் கொலை செய்யும் முறைக்கு "execution" என்பார்கள்.

வாயில் சுட்டுக்கொன்றால் ரகசியத்தினை உளறியதற்கு தண்டனை, காதில் சுட்டாலோ,குத்திக்கொன்றாலோ அவனுக்கு ஏதோ ரகசியம் தெரிந்துவிட்டது என்பதால் கொன்றதாக பொருள்.கண்ணில் சுட்டால் ,ஒருவன் பார்க்க கூடாத ஒன்றை பார்த்த சாட்சி விட்டு வைக்க கூடாது எனக்கொன்றதாக பொருள்.

காவல் துறை கொலை நடந்த முறை வைத்து மாபியாக்கள் செய்த கொலையா இல்லை தனி நபர் செய்த கொலையா என முடிவு செய்து அதன் அடிப்படையில் விசாரணை செய்வார்கள்.

பொண்ணு கொடுத்து பொண்ணு எடுப்பது போல படத்தில் அடிக்கடி சூட் கேஸ் கொடுத்து சூட் கேஸ் வாங்குறாங்க ,அப்படினா கள்ளக்கடத்தல் செய்றாங்களாம், கஸ்டம்ஸ்ல மாட்டிக்கிட்ட சரக்கை சர்வசாதாரணமா போய் எடுத்துக்கிட்டு வராங்க, அதில கூட புதுசா எதுவும் யோசிக்கவில்லை.
கதைப்படி படம் 90களில் நடப்பதாக வருகிறது,ஆனால் நடு நடுவே மொபைல் போனில் எல்லாம் பேசிக்கிறாங்க, அந்த காலக்கட்டத்தில் மாபியாக்களுக்கு தனியா ஸ்பெக்ட்ரம் ஒதுக்கீடு செய்த ராசா யாரோ ?

புலம்பெயர் தமிழர் முகாமில் இரவில் ஒருவனை சர்வசாதாரணமாக சுட்டுத்தள்ளும் போலீஸ் அதிகாரி பில்லாவை மட்டும் போட்டு தள்ளாமல் கடத்தல் நாடகம் எல்லாம் ஆடுகிறார்.

வசனம் இரா.முருகன் மற்றும் ஜாபர் முகம்மது, எல்லா வசனமும் "குத்து வசனங்களா" பார்த்து பார்த்து செதுக்கி இருக்காங்க :-))

அஞ்சு நிமிஷம் முன்னரே போனால் வேலைவெட்டி இல்லாமல் அலையுறான் சொல்லிடுவாங்க, லேட்டா போனால் பொறுப்பில்லை சொல்லிடுவாங்க,சரியான டைமுக்கு போனால் தான் நம்பிக்கை வரும்னு ஒரு நிர்வாகவியல் தத்துவ வசனம் எல்லாம் இருக்கு,இதை எடுத்துக்கொடுத்தது அனேகமா நிர்வாகவியல்பற்றி புத்தகம் போட்ட அந்த பிரபலப்பதிவராக தான் இருக்கும்னு நினைக்கிறேன்:-))

சந்தை மதிப்புள்ள நாயகன் அஜித்தை வீண் அடித்துவிட்டார்கள் என்றே சொல்லலாம், இதே கதையை கொஞ்சம் ,பட்டி ,டிங்கரிங் பார்த்து எடுத்திருந்தால் சூப்பர் ஹிட் ஆகும் வாய்ப்புள்ளது ,தவறவிட்டு விட்டார்கள், அல்லது கார்ப்பரேட் பணம் ,நமக்கு என்ன எதையோ எடுத்து சுருட்டிக்கொடுத்துவிட்டு லாபத்துடன் ஒதுங்கிக்கொள்ளலாம் என முதல் பிரதி எடுத்த wide angle creations நினைத்து இருக்கலாம்.

இதற்கு முன்னர் ஆட்லேப்ஸ், மோசர் பேயர், பிரமிட் சாய்மீரா, அய்ங்கரன் போன்ற கார்ப்பரேட் படத்தயாரிப்பாளர்களுக்கு இப்படி படம் எடுத்து தான் சங்கு ஊதினார்கள், இது போல படம் எடுத்துக்கொண்டிருந்தால் தமிழ் சினிமாவில் பெரிய அளவில் கார்ப்பரேட்கள் படம் எடுக்க முன் வரமாட்டார்கள் என்பதை executive producer ஆக செயல்படும் தமிழ் தயாரிப்பு படாதிபதிகள் உணர வேண்டும்.

hollywood பாணியில் prequel ஆக வந்த முதல் தமிழ்/இந்தியப்படம் என்ற அளவில் தமிழ் சினிமா வரலாற்றில் பில்லா-2விற்கு ஒரு பெயர் கிடைக்கும்,மற்றப்படி ஹாலிவுட்டிற்கும் பில்லா-2 விற்கும் சுமார் 8,969 மைல் தூரம் (சென்னையில் இருந்து லாஸ் ஏஞ்சல்ஸ் அவ்ளோ தூரத்தில் இருக்கு)

இது திரைப்படத்தின் மீதான விமர்சனம் அல்ல , படத்தின் மீதான என்னுடைய கண்ணோட்டமே, நீங்கள் விமர்சனம் என நினைத்தால் அதற்கு அடியேன் பொறுப்பல்ல :-))

என்ன கொடுமை சார் இது !
*****
பூட்டாத பூட்டுக்கள்.



தலைவரே டாஸ்மாக்கிற்கு பூட்டுப்போடும் போராட்டம்னு அறிவிச்சாலும் அறிவிச்சிங்க ராத்திரி பத்து மணியானால் போதும் டாஸ்மாக் மதுபானக்கடையில இருந்து போன் போட்டு "கடைய பூட்டுற டைம் ஆச்சு சீக்கிரம் பூட்டு எடுத்துக்கிட்டு வாங்கன்னு" சொல்லிக்கலாய்க்கிறாங்க ...என்னால நிம்மதியா தூங்க முடியலை ...தூங்கி ஒரு வாரம் ஆச்சு அவ்வ்!

என்ன கொடுமை சார் இது!
*****

A Train to Hell.



புது தில்லியில் இருந்து கடந்த சனியன்று சென்னைக்கு புறப்பட்ட தமிழ்நாடு விரைவு தொடர் வண்டி இன்று (30-07-12)அதிகாலை நெல்லூர் அருகே வரும் போது பெரும் தீவிபத்தில் சிக்கியுள்ளது, தீவிபத்திற்கு காரணம் மின் கசிவு என்கிறார்கள், எஸ்-11 தூங்கும் வசதியுள்ள பெட்டியில் பயணித்த 72 பயணிகளில் சுமார் 50 பேர் இறந்திருக்கலாம் என கருதப்படுகிறது. உயிரிழந்தவர்கள் பெரும்பாலோனோர் தமிழகத்தினை சேர்ந்தவர்களாக இருப்பதற்கே வாய்ப்புள்ளது என்பது மிகவும் வருந்த தக்கது.


வழக்கம் போல மத்திய ரயில்வே அமைச்சர் முகுல் ராய் தலா 5 லட்சம் இழப்பீடு அறிவித்துள்ளார். இழப்பீடு இழந்த உயிர்களை மீட்டு தருமா?

தமிழகத்தில் திருச்சி ரயில் விபத்திற்காக பதவியை துறந்த அப்போதைய மத்திய ரயில்வே அமைச்சர் அமரர்."லால் பகதூர் சாஸ்திரியின்" ஆன்மா மன்னிக்குமா இவரை?

அவரது கட்சி தலைவி மம்தாவுக்கோ அரசியல் சண்டைப்போடவே நேரம் போதவில்லை, கட்சியின் அமைச்சர்கள் சரியாக வேலை செய்கிறார்களா என எங்கே கவனிக்க போகிறார்.

பெரும்பாலான இந்திய ரயில்ப்பெட்டிகள் பராமரிப்பு இன்றி குப்பை வண்டிப்போலவே இருக்கிறது. தண்டவாளங்களும், சிறியதும் பெரியதுமான பழைய பாலங்களும் பிரிட்டிஷ் காலத்தில் அமைக்கப்பட்டவையே,அவை அனைத்தும் வலுவிழுந்து இப்பவோ அப்பவோ இடிய,உடைய தயாராக இருக்கின்றன.

இதனாலேயே இந்தியாவில் அடிக்கடி தொடர் வண்டிகள் தடம் புரள்வது, தண்டவாளத்தில் வெடிப்பு என்றெல்லாம் நடக்கிறது.பலவீனமான சிறிய பாலங்களில் இரயில்கள் மெதுவாக இயக்கபடுவதாலே பயண நேரம் அதிகம் ஆகிறது. உலகிலேயே சராசரி வேகம் குறைவாக உள்ள ரயில்வே அமைப்பு இந்தியாவாகும்.


இந்திய ரயில்வே துறை தான் உலகிலேயே அதிக பணியாளர்களை கொண்ட ,உலகின் நான்காவது பெரிய இருப்பு பாதை ஸ்தாபனம் ஆகும், மொத்தம் 64,015 கி.மீ நீளம் கொண்ட இருப்பு பாதைகளும், ஒரு நாளுக்கு 10 மில்லியன் பயணிகள் பயணிக்கும் வசதியும் கொண்டது.மேலும் இங்கிலாந்தில் முதல் ரயில் இயக்கப்பட்ட சில ஆண்டுகளிலேயே இந்தியாவில் மும்பை -தானே இடையே இருப்பு பாதை அமைக்கப்பட்டு 1853 இல் பயணிகள் புகைவண்டி பயணம் துவங்கப்பட்டுவிட்டது.

அதற்கும் முன்னரே 1837 இல் சென்னையில் ரெட் ஹில்லுக்கும் பரங்கிமலைக்கும் இடையே கற்களை ஏற்றி செல்லும் சரக்கு ரயில் இருப்புப்பாதை அமைக்கப்பட்டுவிட்டது.1856 இல் சென்னையில் முதல் பயணிகள் புகைவண்டி ராயபுரத்திற்கும் வாலாஜாவிற்கும் இடையே இயக்கப்பட்டுள்ளது.

இவ்வளவு வரலாற்று புகழ் வாய்ந்த இந்திய ரயில்வே துறை வெள்ளைக்காரர்கள் விட்டு சென்றப்போது இருந்தது போலவே இன்றும் செயல்ப்பட்டு வருவது நம் இந்திய அரசியல்வாதிகளின் செயல்படும் லட்சணத்திற்கு சான்றாகும்.நமக்கு பின்னால் ரயில் போக்குவரத்து ஆரம்பித்த சீனா எல்லாம் எவ்வளவோ முன்னேறி எங்கோ போய்விட்டது. நாம் தொழில்நுட்பத்திலும், பாதுகாப்பு விஷயத்திலும் இன்னும் அசட்டையாக இருப்பதால் அடிக்கடி விபத்துகள் ,உயிரிழப்புகள் சகஜமாகிவிட்டது.தினசரி இந்தியாவின் எங்கோ ஒரு பகுதியில் ரயில் விபத்து என செய்தி வருவது இயல்பான ஒன்றாகிவிட்டது.

இது போன்ற விபத்துக்களுக்கு காரணத்தினை மட்டும் அதிகாரிகள் வக்கணையாக கண்டுப்பிடித்து சொல்வார்கள் ஆனால் மீண்டும் நிகழாமல் தடுக்க எதுவும் செய்ய மாட்டார்கள், கேட்டால் டிவிஷன் ,மண்டலம், மத்தியம் எனப்போய் அமைச்சரிடம் அனுமதி வாங்கி வரவேண்டும் ,அதற்குள் ஆட்சி மாறி புது அமைச்சர் வந்திருப்பார் ,அவர் மீண்டும் ஆரம்பத்தில இருந்து எல்லாம் பார்க்க ஆரம்பிப்பார், இப்படியே ஒரு வேலையும் நடக்காமல் துருப்பிடித்து இற்றுப்போன ரயில்பெட்டிகளை வைத்து ஓட்டிக்கொண்டு இருப்பார்கள். அதில் டிக்கெட் வாங்க முண்டியடித்துக்கொண்டு மக்களும் நிற்பார்கள்.உயிரைப்பற்றி மக்களுக்கும் கவலையில்லை ஆள்வோருக்கும் கவலை இல்லை.நம் தேசமே சித்தம் போக்கு சிவன் போக்கு என அதுப்பாட்டுக்கு தானாக இயங்கிக்கொண்டு இருக்கு.

வெளியில் போய் மீண்டும் உயிரோடு வீட்டுக்கு திரும்புவது என்பதற்கு எவ்வகை உத்தரவாதமும் இல்லாத மரண தேசமாக விளங்குகிறது நம் நாடு. அவரவர் உயிருக்கு அவர்களே பொறுப்பு, உயிரோடு பிழைத்துக்கிடப்பது அதிஷ்டம் அல்லது பூர்வ ஜென்ம புண்ணியம் என்று தான் சொல்லவேண்டும்.

இரயில் பயணங்களில் விபத்துகள் முடிவதில்லை!

என்ன கொடுமை சார் இது!
---------

பின் குறிப்பு:

தகவல்,படங்கள் உதவி, விக்கி, கூகிள், யூட்யூப்,இந்து நாளேடு, ஆசியன் கரஸ்பாண்டன்ட் இணைய தளங்கள் நன்றி!

*****

Tuesday, July 17, 2012

The DON- A guide to understand gangster films.



ஹாலிவுட்டில் டான்(Don) வகை "mafia gangster"படங்கள் ஏக பிரசித்தம் அதில் மார்லன் பிராண்டோவின் "தி காட் ஃபாதர்"(The godfather) அல்டி மேட் எனலாம், இப்படம் மரியோ பூசோ (mario puzo)எழுதிய "தி காட் ஃபாதர்" என்ற நாவலின் அடிப்படையில், ஃபிரான்ஸிஸ் ஃபோர்ட் குப்போலா (Francis ford coppola)இயக்கியது.அதே போல குட்ஃபெல்லாஸ்(goodfellas), ஸ்கார்ஃபேஸ்(sacrface,1932 &1983) என பல புகழ்ப்பெற்ற டான் படங்கள் உண்டு.
(1932 முதல் ஸ்கார்ஃபேஸ்)

இந்தியாவில் டான் படங்களை முதலில் அறிமுகப்படுத்தி புகழ்ப்பெற செய்தது இந்தி திரைப்படங்கள் எனலாம், அதில் "அமிதாப் பச்சன் ஶ்ரீவத்ஸ்வா" நடித்து இன்றளவும் "டான்" வகைப்படங்களுக்கு முன்னோடியானது "டான் "என்ற பெயரில் வந்த இந்திப்படம் ஆகும். அக்காலத்தில் மிகப்பெரிய ஹிட் ஆன படம், இதனால் அமிதாப்பிற்கு இந்தி திரையுலகின் டான் என்ற பட்டப்பெயரும் உருவானது, இன்று ஷாருக் கான் எல்லாம் வந்துவிட்டாலும் "அமிதாப்பின் டான்" இமேஜ் அப்படியே தான் உள்ளது.
(1983 இல் அல்பாசினோவின் ஸ்கார்ஃபேஸ்)
(உண்மையான மாபியா டான் "ஸ்கார்ஃபேஸ்"அல் கேபோன்)

இந்தி " டான்" திரைப்படம் உருவானதை சுருக்கமாக பார்க்கலாம், நாரிமன் இரானி (Nariman.A.Irani)என்ற ஒளிப்பதிவாளர் மற்றும் தயாரிப்பாளர் "Zindagi Zindagi (1972) என்ற படத்தினை Sunil Dutt நடிப்பில் தயாரித்ததில் 10 லட்சம் கடனாளியாக்கிய சூழலில்,இயக்குநர் மனோஜ் குமாரின் " Roti Kapada Aur Makaan (1974), என்றப்படத்திற்கு ஒளிப்பதிவு செய்துள்ளார், அப்படத்தில் நடித்துக்கொண்டிருந்த அமிதாப் பச்சன், ஜீனத் அமன்(jeenat aman), ப்ரன் (pran)மற்றும் அப்படத்தின் உதவி இயக்குநர் சந்திரா பரோட்(chandra barot) ஆகியோர் ,நாரிமன் இரானியின் கடன் சுமையை அறிந்து அவருக்கு உதவ ஒரு படம் செய்து கொடுப்பதாக உறுதியளித்துள்ளார்கள். அதற்கான கதையை சலிம்-ஜாவித் அக்தரிடம் கேட்டுள்ளார்கள், அவர்கள் கொடுத்த கதையில் "டான்" பாத்திரம் இருக்கவே படத்திற்கு டான் எனப்பெயரிட்டு எடுக்கப்பட்டது. இப்படத்தில் "டான்" மற்றும் அதே போன்ற உருவமுடைய விஜய் என்ற அப்பாவி இளைஞனாகவும் அமிதாப் இரட்டை வேடத்தில் நடித்திருப்பார்.

இந்த டான் திரைப்படம் 1962 இல் ஷம்மி கபூர் நடிப்பில் வந்த "சைனா டவுன்" என்ற படத்தின் தழுவல் என்று சொல்கிறார்கள். அதில் ஒரே உருவ அமைப்புள்ள அண்ணன் ,தம்பி ஆகவும், ஒருவர் டான்,மற்றவர் அப்பாவி ,பின்னர் ஆள்மாறாட்டம் எனக்கதை. இப்படமே தமிழில் எம்ஜிஆர் நடிப்பில் "குடியிருந்த கோயில்" என ரீமேக் செய்யப்பட்டது. தெலுங்கில் என்.டி.ராமா ராவ் நடிப்பில்"பலே தம்முடு" எனவும் ரீமேக் செய்யப்பட்டு , அனைத்து மொழியிலும் சூப்பர் ஹிட் ஆனது.

டான் படம் முடியும் முன்னரே நாரிமன் இரானி வேறு ஒருப்படப்பிடிப்பில் ஒளிப்பதிவு செய்யும் போது விபத்தில் சிக்கி மரணமடைந்து விட்டார், பின்னர் சந்திரா பரோட் ,அவரது குரு "இயக்குநர் மனோஜ் குமார் "உதவியுடன் "Khaike Paan Banaraswala" என்றப்பாடலையும் எடுத்து படத்தில் சேர்த்து 1978 இல் வெளியிட்டார், ஆனால் முதல் வாரத்தில் சரியாக வசூல் ஆகாமல் தோல்விப்படம் ஆகக்கூடிய சூழலில் "Khaike Paan Banaraswala" பாடல் மிகப்பெரிய ஹிட் ஆனது, அதனை தொடர்ந்து மக்கள் வாய்மொழி விளம்பரத்தால் நன்கு ஓடி அவ்வாண்டின் மிகப்பெரிய ஹிட் ஆனது.படத்தின் மூலம் கிடைத்த வருவாய் நாரிமன் இரானியின் விதவை மனைவிக்கு கொடுக்கப்பட்டது. இப்படத்தினை முடித்து வெளியிட பல சிரமங்கள் ஏற்பட்டதால் "ஜீனத் அமன்" சம்பளம் வேண்டாம் என சொல்லிவிட்டார். மற்றவர்களும் குறைவான சம்பளத்திலேயே வேலை செய்துள்ளார்கள்.
(அக்கால "கனவுக்கன்னி" ஜீனத் அமன்)


படம் முடிந்தவுடன் பார்த்துவிட்டு படத்தில் "மஜாவா" ஒரு பாடல் இருந்தால் நன்றாக இருக்கும் என இயக்குனர் மனோஜ் குமார் அவரது செலவிலேயே எடுத்து சேர்த்த பாடல் தான் "Khaike Paan Banaraswala" (சூப்பர் ஸ்டாரின் பில்லாவில் வெத்தலைய போட்டேண்டி),அப்பாடலின் வெற்றியே படத்தினை வெற்றியாக்கியது. கடனில் சிக்கிய சக தயாரிப்பாளருக்கு அக்காலத்திலேயே உதவியுள்ளார்கள் இந்தி திரையுலகினர், எதை எல்லாமோ காப்பி அடிக்கும் தமிழ் திரைப்பட "பாக்ஸ் ஆபிஸ் கிங்"கள் இந்த நல்லப்பழக்கத்தினையும் காப்பி அடிக்கலாமே :-))

(கோலிவுட் டான்"சூப்பர் ஸ்டார்)

இந்தி டான் பின்னர் தமிழில் சூப்பர் ஸ்டாரின் நடிப்பில் பில்லா என வெளிவந்து சூப்பர் ஹிட் ஆனது , அப்புறம் அஜித் நடிப்பில் பில்லா-1 ,2 என வந்து கலெக்‌ஷண் அள்ளியது, இந்தியில் ஷாருக்கான் நடிப்பில் டான் 1,2 என வந்து சூப்பர் ஹிட் ஆனது எல்லாம் அனைவரும் அறிந்ததே.

இந்திய திரையுலகின் நிரந்தர டான் "அமிதாப்" அவர்களின் டான் படத்தில் இருந்து "மே ஹூன் டான்"(Main hoon Don) பாடலின் காணொளி. இப்பாடலே தமிழில் "மை நேம் இஸ் பில்லா" ஆகியது. இந்தியில் கிஷோர்குமார் பாடியது, (தமிழ். எஸ்.பி.பி)

இது வரையில் திரையுலக "டான்" கதாப்பாத்திரங்களைப்பார்த்தோம், இனி டான், மாபியா போன்ற நிழல் உலக குற்ற சாம்ராஜ்யம் உருவான வரலாற்றைப்பார்ப்போம்.

டான் (don)என்ற சொல் "dominicus" என்ற இலத்தின் சொல்லின் சுருக்கப்பட்ட வடிவம் , அதன் பொருள் லார்ட், மாஸ்டர் என்பதாகும், இலத்தின் புழக்கத்தில் இருந்த இத்தாலி, ஸ்பெயின், போர்ச்சுகல் ஆகிய நாடுகளில் நிலச்சுவாந்தார்கள், பிரபுக்களை பெயருக்கு முன்னால் "டான்" எனப்போட்டு மரியாதையாக அழைப்பது வழக்கம். அதாவது ஒரு நிலப்பகுதியை ஆள்பவர்கள் எனலாம், "domain" என்பது "dominicus" இல் இருந்தே உருவானது.

ஸ்பெயினில் மிஸ்டர் என ஆங்கிலத்தில் சொல்வதற்கு இணையாக "டான்" என பெயருக்கு முன்னால் சேர்த்து சொல்வார்கள், உதாரணமாக டான் குவிசோட்(Don quixote), டான் ஜுவான் (Don juan)போன்ற கதாப்பாத்திரங்களை கேள்விப்பட்டு இருப்பீர்கள்.

டான் என்ற சொல் இங்கிலாந்தில் பிரபுக்களை "லார்ட்"(lord) என்று சொல்வதற்கு ஒப்பான மரியாதை மிக்க சொல் , பெண்களினை உயர்வாக அழைக்க பெயருக்கு முன்னால் "டோனா" (Dona)என்று சேர்த்து அழைப்பார்கள், டானின் பெண்பால் டோனா ஆகும்.லார்டுக்கு பெண்ப்பால் "லேடி" (Lady)ஆகும்,ஆனால் இப்பொழுது பொதுவாக பெண்களை எல்லாம் "லேடி" என்று அழைத்து விடுகிறோம் :-))

இங்கிலாந்தில் உள்ள கேம்பிரிட்ஜ்,ஆக்ஸ்போர்ட் பல்கலைக்கழக பேராசிரியர்கள் அனைவருக்கும் பட்டப்பெயர் "டான்" ஆகும். அப்பல்கலைக்கழக பேராசிரியர்கள் பெயருக்கு முன்னால் "டான்"சேர்த்துக்கொள்ளும் வழக்கம் அக்காலத்தில் இருந்துள்ளது.அதே போல அப்பல்கலைக்கழக மாணவர்களும் தங்களை "டான்" என சொல்லிக்கொள்வதுண்டு. பெரும்பாலான கல்லூரிகளில் மாணவர் விடுதி தலைவருக்கு "டான்" என்று பெயர். பெரும்பாலும் மாணவர்கள் மொழியாக அப்போது டான் என்ற சொல் பிரசித்தம் அடைந்து இருந்தது.

ரஷ்யாவில் ஓடும், வோல்கா நதியின் கிளை நதிக்கு பெயரும் டான் ஆகும், அதே போல இங்கிலாந்தில் கேம்பிரிட்ஜ் பகுதியிலும் "டான்" என்ற சிறிய நதி ஓடுகிறது.இப்போ அவர்களை ஏன் டான் பெயரால் அழைக்கப்படுகிறார்கள் என்பது புரிந்திருக்கும்.

நிழல் உலகத்தினருக்கு டான், மாபியா என்றெல்லாம் பெயர வைத்து அழைக்க ஆரம்பிக்க காரணமானவை அக்காலப் பத்திரிக்கைகளும், எழுத்தாளர்களுமே, உண்மையில் கேங்க்ஸ்டர்கள் இடையே அப்படியான பழக்கம் அப்போது இல்லை, பின்னர் அவர்களும் பழக்கப்படுத்திக்கொண்டார்கள்.

டான் என்ற சொல் புழக்கத்திற்கு வந்த வழிப்பார்த்தோம் , அடுத்து "மாபியா" என்ற சொல் புழக்கத்திற்கு வந்த வழியைப்பார்ப்போம்.

mafia என்ற சொல் " mafioso"(mafiosi or mafiusi or mafiusu) என்ற இலத்தின் சொல்லின் குறுகிய வடிவம் ஆகும், " mafioso" என்றால் வீரமான , அல்லது சண்டைக்கு அஞ்சாதவன் என்று பொருள், சுருக்கமாக சொன்னால் ஒரு குழுவாக வம்பு சண்டைக்கு செல்பவர்கள், யாராவது சண்டைக்கு ஆட்கள் கேட்டால் போவார்கள், கூலிப்படை ,சண்டியர்கள் எனலாம்.

தெற்கு இத்தாலியில் உள்ள மேற்கு சிசிலியில்(sicily) பாலெர்மோ(palermo) என்ற இடத்தினை பூர்வீகமாக கொண்டு வாழ்ந்தவர்கள், 1842-60 காலக்கட்டங்களில் இத்தாலியில் புரட்சி நடைப்பெற்ற போது , கிளர்ச்சியாளர்களுடன் சேர்ந்து அரசப்படைகளை கொல்வது , அலுவலங்களுக்கு நெருப்பு வைப்பது என்று செய்துவிட்டு கிடைத்த பொருளை சுருட்டிக்கொண்டு செல்வது வழக்கம், மேலும் கலவரம் நடக்கும் இடங்களில் இவர்களும் புகுந்து துப்பாக்கியால் சுட்டு விட்டு கடைகளை கொள்ளையடிப்பது வழக்கம், இதனால் ஆரம்பத்தில் இவர்களையும் புரட்சியாளர்கள் என நினைத்துக்கொண்டது அரசாங்கம், பின்னரே கொள்ளையடிப்பது வேறு ஒரு கும்பல் எனக்கண்டுக்கொண்டார்கள்.

கலவரத்தின் போது கடைகளை சூறையாடும் உள்ளூர் ரவுடிகள் நம்ம ஊரிலும் உண்டு, எம்.ஜி.ஆர்,இந்திராக்காந்தி ஆகியோரின் மறைவின் போது ஏற்பட்ட கலவரத்தின் போது பலக்கடைகள் சூறையாடப்பட்டது நினைவிருக்கலாம்.

இத்தாலியில் புரட்சி முடிந்து புதிய ஆட்சி அமைந்ததும், கொள்ளையடிக்க முடியாமல் போகவே ,அங்குள்ள நிலப்பிரபுக்களின் ஆரஞ்சு, எலுமிச்சை தோட்டங்கள், மற்றும் வயல்களில் திருடுப்போவதை தடுக்கும் காவலர்கள் பொறுப்பினை செய்தார்கள், ஏன் எனில் அங்கு திருடுவதும் " mafioso" வகை மக்களே, எனவே அவர்களை அடக்க மற்றொரு " mafioso" குழுவை வேலைக்கு வைத்தார்கள் நிலப்பிரபுக்கள்.அவ்வாறு பாதுகாப்பு அளிப்பதற்கு அளிக்கும் பணம் பிஸ்ஸோ(pizzo=protection money) எனப்பட்டது.

இம்முறை நம்ம ஊரிலும் அக்காலத்தில் உண்டு "கள்ளர்கள்" திருடுவதை குலத்தொழிலாக செய்வதும் அவர்களிடம் இருந்து பாதுகாக்க மறவர்களை பணிக்கு வைப்பதும் வழக்கம், அரவாண் படத்தில் "கரிகாலன்" பாத்திரம் இப்படியான ஊர்க்காவலன் வேடத்திலும், பசுபதி கள்ளனாகவும் நடித்திருப்பதைக்காணலாம்.

" mafioso" க்கள் தங்களுக்கு வேலைக்கொடுத்து பணம் கொடுக்காத பண்ணைகளில் அவர்களே திருட ஆள் அனுப்பவும் செய்தார்கள், பணம்கொடுக்காத நிலப்பிரபுக்களை மிரட்டவும் செய்தார்கள்." mafioso" தங்களுக்குள் ஆளுக்கு ஒரு பகுதி எனப்பிரித்துக்கொண்டு இதனை ஒரு குடும்பத்தொழிலாக செய்ய ஆரம்பித்தார்கள். 26(100கும் மேல் உண்டு)குடும்பங்களின் கீழ் பல குழுக்களாக பிரிந்து வேலை செய்தார்கள்.

எத்தனை நாளுக்கு தான் பண்ணைகளில் மிரட்டி கப்பம் வசூலிப்பது என மெல்ல நகரப்பகுதிகளில் வணிகர்களையும் மிரட்டி கப்பம்(protection money) கேட்டார்கள், கொடுக்காதவர்களின் கடைகளை சூறையாடுவது வழக்கம்,மேலும் சரக்கு வாகனம் செல்லும் போது நடு வழியில் கொள்ளை அடித்து விடுவார்கள், அதெல்லாம் செய்யாமல் இருக்க "கப்பம்" செலுத்த வேண்டும், 26 குடும்ப குழுக்கள் இருந்ததால் ஒரு குழுவின் பாதுகாப்பு பெற்ற வியாபாரியின் உடைமையை மற்ற குழு கொள்ளை அடிப்பது அடிக்கடி நிகழும்.

" mafioso" க்கள் சட்டத்திற்கு புறம்பானவர்கள் என்றாலும் தொழில்பக்தி,நேர்மை உடையவர்கள், அவர்களிடம் கப்பம் செலுத்தி பாதுகாப்பு பெற்றவர்களுக்காக உயிரையும் கொடுத்து சண்டைப்போடுவார்கள்,இதனால் அடிக்கடி " mafioso" க்கள் இடையே குழுச்சண்டை ,கொலை எல்லாம் நடக்கும், இப்படியான தொடர் அடிதடி, கொலைகளின் விளைவாக 5 " mafioso" குடும்ப குழுக்கள் மட்டுமே பெரிய குழுவாக வளர்ந்து நின்றது,மற்ற குழுக்கள் எல்லாம் இந்த ஐந்தில் அடங்கிவிட்டது.

இக்காலக்கட்டத்தில் தான் " mafioso" க்கள் ஒரு முறையான நிர்வகிக்கப்படும் குழுவாக மாறினார்கள், ஒவ்வொரு குழுவின் ஆளுகைக்கும் உட்பட்ட பகுதியை டிஸ்ட்ரிக்ட்(district) என பிரித்துக்கொண்டார்கள், அங்கு மட்டுமே கப்பம் வசூலிக்க வேண்டும், அப்பகுதியின் அதிகாரப்பூர்வமற்ற நிலப்பிரபுக்கள் ஆனார்கள், இதனாலேயே "டான்"(don) என மற்றவர்கள் அழைக்கலானார்கள், அப்போதும் கூட அவர்களுக்குள் டான் என்றோ மாபியா என்றோ சொல்லிக்கொள்ள ஆரம்பிக்கவில்லை.

" mafioso" என்றப்பெயர் வெளிப்படையாக தெரிய ஆரம்பித்தது 1863 இல் எழுதப்பட்ட " I mafiusi di la Vicaria, " or "The Beautiful People of Vicaria." என்ற நாடகத்தின் மூலமே, இதனை Giuseppe Rizzotto and Gaetano Mosca, என்பவர்கள் எழுதினார்கள். இந்நூலில் பாலெர்ம்மோ சிறையில் சண்டையிட்டுக்கொண்ட இரண்டு குற்ற குழுக்களை விவரித்து " mafioso" க்கள் என சொல்லிருந்தார்கள், அதன் பின்னரே " mafioso" என்பவர்கள் பயங்கரமான குற்றவாளிகள் எனப்பரவ ஆரம்பித்தது, பின்னர் சுருங்கி மாபியா ஆகிவிட்டது.

மாபியாக்கள் என்ன தான் திறமையான வீரர்கள் ஆக இருந்தாலும் எப்படி மக்கள் கட்டுப்பட்டார்கள், அரசாங்கம் என்ன செய்தது என்று கேள்வி எழலாம், இதற்கெல்லாம் பின்னால் வாட்டிகனும், பிற்காலத்தில் பெரியண்ணன் அமெரிக்காவும் உதவியாக இருந்தது என்பதும் ஒரு காரணம்.

இப்போது ஆரம்பக்காலத்தில் வாட்டிகன் மறைமுகமாக உதவியதைக்காணலாம். " mafioso" க்கள் பற்றி ஒரு அதிகாரப்பூர்வமற்ற வரலாறு உண்டு, அக்காலத்தில் கிருத்துவ மதத்தினை ஏற்காமல், கிருத்துவர்களை கொலை செய்த பழங்குடியின குழுக்களும்(catalan marauders) இருந்தன ,அவர்களிடம் இருந்து கிருத்துவர்களை காக்க போர்ப்பயிற்சி பெற்ற ஒரு ரகசிய குழுவை வாட்டிகன் உருவாக்கி பழங்குடியினரை வேட்டையாட வைத்தது என்கிறார்கள்.அப்படிப்போர்ப்பயிற்சி பெற்ற குழுக்கள் தான் " mafioso" குழு என்பதாகும்.

இதற்கு ஆதாரம் என எதுவும் இல்லை,ஆனால் வாட்டிகன் பல அரசியல், போர் என செய்து தான் கிருத்துவத்தினை நிலை நாட்டியது என்பதனையும் மறுக்க முடியாது. ஃப்ரீ மேசன்(freemason), சிலுவை போர் என எல்லாம் வரலாற்று ரீதியாகவும் ஆதாரங்கள் இருக்கு. தி பிரைஸ்ட் (the priest)என்ற படத்தில் இரத்தக்காட்டேரிகளை வேட்டையாட என ஒரு போராளிக்குழுவை வாட்டிகன் (கிருத்துவ தலைமை பீடம்) உருவாக்கியதாக கதை சொல்லப்பட்டிருக்கும். இவ்விடத்தில் பழங்குடியினரை இரத்தக்காட்டேரிகள் என உருவகப்படுத்தி இருக்கலாம் என நினைக்க தோன்றுகிறது.

மேலும் 1860 இல் புரட்சி முடிந்து இத்தாலியில் சார்டினா கிங் "Victor Emmanuel" தலைமையில் உருவான ஃபாசிஸ்ட் அரசு வாட்டிகனுக்கு எதிராக செயல்பட்டது, வாட்டிகனை தன்னாட்சி பெற்ற அரசாக கருத முடியாது,போப்பும் இத்தாலி அரசின் சட்ட திட்டங்களுக்கு கட்டுப்பட்டவர் என சொன்னது. பின்னர் 1870 இல் வாட்டிகனை(அப்போது அது நகரம் அல்ல,போப்பின் இருப்பிடம் மட்டுமே,மவுன்ட் வாட்டிகன் என மலையும், அவ்விடத்திற்கு பெயர் புனிதக்கடல்(holy sea) எனப்பட்டது, வாட்டிகன் நகர் என 1927 இல் சூட்டப்பட்டது),ரோம் ஆகியவற்றை கைப்பற்றி ரோமை ஒருங்கிணைந்த இத்தாலியின் தலைநகராக Victor Emmanuel அறிவித்துவிட்டு ,போப்புக்கு என சில இடங்களும் ,மாநியமும் மட்டும் அளித்தார்.இதனை law of guarantees என்ற பெயரில் போப் பியுஸ்-9க்கு தெரிவித்தார்.

இதனை ஏற்க மறுத்த போப் பியுஸ்-9 (pope "Pius IX "), 1870 இல் ஒரு பிரகடனம் செய்தார்" ரோமன் கத்தோலிக்க கிருத்துவர்கள் யாரும் இத்தாலி அரசின் சட்டத்திட்டங்களுக்கு கட்டுப்பட தேவையில்லை ,அப்படிக்கட்டுப்படுவது கிருத்துவுக்கும், ஏசு கிருத்துவுக்கும் எதிரானது(anti catholic) , ரோமன் கத்தோலிக்கர்களின் தலைவர் போப் மட்டுமே என்று .இதனை பயன்ப்படுத்தி கொண்ட மாபியாக்கள் இத்தாலியின் வணிகர்கள், நிலப்பிரபுக்கள் அனைவரிடமும் இனி உங்களுக்கான நீதி மன்றம்,சட்டம் ,ஒழுங்கு எல்லாம் நாங்கள் தான், உங்கள் பாதுகாப்புக்கு நாங்களே பொறுப்பு என்று அறிவித்தார்கள்.எந்த பிரச்சினை என்றாலும் மாபியாக்களையே அணுக வேண்டும்,அதுவே கிருத்துவ கொள்கைக்கு உட்பட்டது என பிரச்சாரம் செய்து கொண்டார்கள்.

மக்களும் கிருத்துவத்தின் மீது இருந்த பற்றினாலோ அல்லது அரசின் மீது இருந்த வெறுப்பினாலோ அல்லது மாபியாக்களின் மீது இருந்த பயத்தினாலோ ஏதோ ஒன்றினால் மாபியாக்களுக்கு கட்டுப்பட ஆரம்பித்தார்கள். மாபியாக்களுக்கு மாதம் தவறாமல் கப்பம் கட்டப்பட்டது. மாபியாக்கள் நகரின் சூதாட்ட விடுதி, கள்ளச்சாராயம், போதை மருந்து,வட்டித்தொழில்,விபச்சாரம் என அனைத்து சட்ட விரோத தொழிலையும் கைவசம் எடுத்துக்கொண்டு சாம்ராஜ்யத்தினை விரிவுப்படுத்தினார்கள்.துறைமுகங்களில் சரக்கு ஏற்றுவது இறக்குவது முதல் அனைத்தும் மாபியாக்கள் கட்டுப்பாட்டின் கீழ் வந்தது.

இதில் மேலும் இன்னொரு காரணமும் இருந்தது அப்போது வ்ட்டித்தொழில்,வங்கி இவற்றை முழுக்க ஆக்ரமித்து இருந்தது யூதர்களே, அவர்கள் இத்தாலிய அரசுக்கு பண உதவி எல்லாம் செய்து வந்தார்கள்,அவர்களது நிதி நிறுவனங்களை முடக்கி " mafioso" க்களின் நிதி நிறுவனம் வளர ஆரம்பித்தது, எனவே யூதர்களின் வியாபாரம் முடங்குவதை வரவேற்று ரோமன் கத்தோலிக்கர்கள் மாபியாவுக்கு ஆதரவு கொடுத்தார்கள்.ஆனால் பின்னாளில் மாபியாக்களிடம் கடன் வாங்கினால் மரணம் என்ற அளவுக்கு மாபியாக்கள் கடுமையாக நடந்துக்கொண்டது தனிக்கதை.

மாபியாக்கள் நன்கு வளர்ந்து வலுவான நிலையில் இணையான நிழல் உலக அரசாங்கம் நடத்தும் நிலையை அடைந்து விட்டதால் தங்களை நிர்வாக ரீதியாக வடிவமைத்துக்கொண்டு , சட்ட திட்டங்கள் எல்லாம் உருவாக்கிக்கொண்டார்கள்.

நிர்வாக அமைப்பு,சட்ட திட்டங்கள் , பிற்கால மாபியாக்களின் வளர்ச்சி, அதில் பெரியண்ணன் அமெரிக்காவின் பங்கினை அடுத்தப்பதிவில் பார்க்கலாம்.

---------
பின் குறிப்பு:

தகவல் மற்றும் படங்கள்,

விக்கி,கூகிள்,நியு என்சைக்கிளோபீடியா,நியு அட்வென்ட்,யூடியூப் இணைய தளங்கள் நன்றி!
*******